Zëdhënësi i Bashkimit Evropian, Peter Stano, e ka konfirmuar vizitën e emisarit të BE-së për dialogun, Miroslav Lajçak, në Kosovë dhe Serbisë këtë të premte.
Ai, në një konferencë për media, ka theksuar se Lajçak do ta shoqërohet nga i dërguar i ShBA-së për Ballkanin Perëndimor, Gabriel Escobar, si dhe këshilltarët për politikë të jashtme të Francës, Gjermanisë dhe Italisë.
“Në Prishtinë, ai do të takohet me kryeministrin e Kosovës, Albin Kurti, dhe më pas në Beograd ai do të takojë presidentin e Serbisë, Aleksandar Vuçiq. Kjo për të diskutuar hapat e ardhshëm në normalizimin e marrëdhënieve mes Kosovës dhe Serbisë”.
“Për këtë vizitë, emisari ynë do të shoqërohet nga këshilltarët për politikë të jashtme të presidentit të Francës, kancelarit të Gjermanisë, dhe të kryeministrit të Italisë. Po ashtu, në këtë takim do të jetë edhe i dërguar i ShBA-së për Ballkanin Perëndimor, Gabriel Escobar”, ka thënë Stano./Prishtinapress/
