Tifogrupi i Kombëtares së Kosovës, “Dardanët” kanë zbuluar sloganin e tyre për ndeshjet kualifikuese të kombëtares kosovare në rrugëtimin e tyre drejt Kampionatit Evropian “Euro 2024”.
“From Pain to Glory – My Dardanian Story” apo në gjuhën shqipe: “Nga dhimbja në lavdi, historia ime dardane” – është slogani që do t’i përcjell “Dardanët” në kampanjën kualifikuese, shkruan lajmi.net.
Deri te ky vendim, sipas tifogrupit kosovar, erdhi për të treguar vuajtjet e popullit dhe përmes tyre të tregojnë rrëfimin e tyre.
POSTIMI I PLOTË:
Pas shumë javësh diskutime, një grup punues i formuar prej disa vullnetarëve dhe kryesisë së tifogrupit, erdhi me disa propozime për sloganin që do ta përdornim për Euro 2024. Propozimet kaluan në të gjithë këshillin vendimmarrës dhe u votua për “From Pain to Euro Glory – My Dardanian Story”. Kështu kujtojmë ta kaluarën, vuajtjet tona si popull dhe përmes tyre dëshirojmë ta tregojmë rrëfimin tonë, që është gërshetim i shumë elementeve që kemi përjetuar, si dhimbjet e deri te krenaria që dëshirojmë ta arrijmë përmes kualifikimit në Evropian.
Ky slogan do të jetë i përbashkët, si i yni si tifogrup Dardanët, ashtu edhe i Federatës së Futbollit të Kosovës.
Kujtojmë për fund se ideator i këtij slogani është Prof. Dr. Gëzim Krasniqi, njëherësh tifoz i vërtetë i Kombëtares së Kosovës, të cilin e falënderojmë këtë kontributin e madh që jep në vazhdimësi.
FORCA KOSOVË.
