10.4 C
Pristina
Thursday, March 28, 2024

Buy now

spot_img

Gënjeshtrat me frikësimin e serbëve në Kosovë, që i “beson” vetëm Albin Kurti dhe Vuçiqi

E vetmja gënjeshtër e madhe e serbëve në Kosovë është se ata ndjehen të frikësuar nga “regjimi” i shqiptarëve. Kjo është një gënjeshtër e cila nuk ka as bazë, dhe as mundësi faktike, dhe mbi të gjitha as ndonjë politikë frikësimi reale.

Shkruan: Mero Baze

Kur Beogradi thotë se serbët në Kosovë janë të frikësuar, kanë parasysh spekulimet që bëjnë me goditje grupesh kriminale, ndonjë prej tyre dhe nga pakica serbe, apo shpesh herë gënjeshtra lidhur me pengesat në veprimtarinë fetare të klerit ortodoks në Kosovë.

Por sot i vetmi njeri që u del zot gënjeshtrave të Beogradit për frikësim të serbëve në Kosovë është fatkeqësisht kryeministri i Kosovës, Albin Kurti. Duke komentuar vendosjen e barrikadave në Veri të Kosovës, Kurti tha sot se “nga frika i vunë, nga frika i hoqën”. Nuk di sa gjatë e ka menduar këtë batutën e dytë, se disa ditë më parë tha “vetë i vunë, vetë i hoqën”, por kjo nuk i pëlqeu shumë pasi tregonte se serbët i vënë e heqin kur të duan barrikadat.

Kjo e sotmja natyrisht që është shumë e rëndë dhe është fiks ajo që do të dëgjojë Beogradi nga Kosova. Një kryeministër që flet se serbët e Kosovës e kanë frikë dhe se kanë ngritur barikada të mbrohen prej tij e më pas i kanë hequr nga frika e tij.

Them se ky qëndrim është vetëm një muzikë e ëmbël për veshët e Beogradit mes të tjerash, se është dhe i pavërtetë.

Barrikadat as u ngritën për t’u mbrojtur nga Albin Kurti, as u hoqën nga frika e Albin Kurtit. Barrikadat ishin një demonstrim i pafuqisë së Albin Kurtit në Veri të Kosovës dhe nga ana tjetër shembull i qartë i komandimit të politikës së serbëve të Kosovës nga Beogradi.

E vërteta është se barrikadat u vendosën nga Beogradi dhe u hoqën nga SHBA, kurse Albin Kurti ia heq përgjegjësinë Beogradit, ashtu siç i heq meritat SHBA dhe i merr të dyja përsipër vetë, d.m.th që i vunë dhe hoqën nga frika e tij.

Dhe gjithë justifikimi i Beogradit ka qenë se serbët në Kosovë janë të frikësuar, ndaj duhet të mbrohen. Fiks siç e tha Albin Kurti.

Dhe sikur të mos mjaftonte kjo deklaratë, një tjetër dhuratë e shtrenjtë për Beogradin ishte ndalimi i Partiarkut serb Porfirije të shkonte në Kosovë më 25 dhjetor. Ndalimi i një autoriteti të lartë fetar të Kishës Ortodokse Serbe për të vizatuar kishat në Kosovë, është dhurata më e shtrenjtë që mund t’i bësh propagandës serbe për frikësim dhe pengim të të drejtave fetare të serbëve në Kosovë, çka nuk është e vërtetë.

Albin Kurti është i vetmi kryeministër që i ka serbët zot në shtëpi të vet dhe do të kapardiset sikur i frikëson. Ai është i vetmi kryeministër ku serbët janë të lirë të gëzojnë liritë fetare dhe ky u ndalon Patriarkun t’i vizitojë.

Edhe një aktor Hollivudi të dërgonte Serbia në Kosovë t’ia bënte regjinë asaj çfarë i duhej të shikonte dhe dëgjonte bota nga serbët e Kosovës, nuk do t’ia bënte më mirë se Albin Kurti. Vetëm ky arrin ta thotë me gojë të vet një gënjeshtër vetëm se u duhet serbve, kur thotë se “nga frika i vunë barrikadat, nga frika i hoqën”. Kaq i mjafton Vuçiqit të thotë që serbët në Kosovë janë të frikësuar.

Vetëm ky mund të ndalë Patriarkun e Kishës Ortodokse të hyjë në Kosovë dhe pastaj të bëjë sikur i jep leje për të respektuar një vasal serb që ka në kabinet, e jo se i takon të mos pengohet si autoritet fetar. Pra do t’u dëshmojë se liria fetare është në dorë të tij.

Serbia nuk do më shume se kaq nga askush tjetër në Kosovë për të qenë e besueshme në gënjeshtrat e saj.

As politikanët serbë të Kosovës nuk kanë mundur t’i sigurojnë dot Beogradit fakte kaq të besueshme që qeveria e Kosovës frikëson serbët dhe u ndalon besimin fetar.

Në të vërtetë, qeveria e Kosovës as i frikëson, as iu ndalon gjë, përkundrazi është e frikësuar prej tyre, por ja që ka goditur një kryeministër që vetëm se do të bëjë batuta patriotike, është gati të gënjejë që Serbia të ndjehet viktimë në Kosovë dhe ky të ndjehet si Mehmet Pushtuesi.

Artikuj të ngjashëm

- Marketing -spot_img
- Marketing -spot_img

Artikujt e fundit

- Marketing -spot_img